سيبوا رمضان في حاله

دلوقتي كل من هب ودب ووقع وقب بيعمل مسلسل. اللي بطّلوا تمثيل تلفزيوني السنة دي عملوا مسلسل، واللي بطّلوا تمثيل خالص برضه السنة دي عملوا مسلسل. طول ما إحنا ماشين في الشارع يُفَت المسلسلات مغرقة الدنيا... عددها يمكن يكون أكتر من إشارات المرور أو حتى العربيات نفسها. حاجة بجد *******!! (تثير الجدل طبعاً)

مش هضحك عليكم... أنا عمري ما كنت متابعة جيدة للتلفزيون (مع إني حافظة كل أغاني التترات). طول عمري أسمع وأشوف كده من بعيد المسلسلات اللي بتنزل في التلفزيون. بس كنت بسمع دايماً عن مسلسل أو إثنين بالكثير في الموسم. من ليالي الحلمية والمال والبنون وزيزينيا... لإمرأة من زمن الحب وغيرهم، مسلسلات بتناقش قضايا عائلية وإجتماعية مهمة ومعظمها على الأقل كانت بتعرضها بطريقة طبيعية وغير مبتذلة. كان منهم اللي بييجي في الصيف واللي بييجي في الشتا... ومنهم كمان اللي بييجي في رمضان، وأهو يسلّوا صيام الناس بالنهار ولمّة العيلة بعد الفطار (القافية غير مقصودة). وكان آخرهم مسلسلين في الشهر الكريم....

ودي كانت آخر فترة تابعت فيها مسلسلات.

أما بقى بعد ما دخل الدش (عقبال عندكو) والقنوات بعد ما كانت إتنين وتلاتة  بقت عشرين وتلاتين ومية ومتين، المسلسلات كمان إتضربت في عشرة ومؤخراً في مية. مافيهاش حاجة... ما هي الناس لازم تتسلى برضه. لكن نفسي أفهم حاجة بقى، ليه المية وشوية مسلسل دول لازم كلهم يبقوا في رمضان؟ هو مش رمضان على حسب ما أفتكر كان شهر الصوم والعبادة والصلاة؟ مش ده برضه الشهر اللي بتتسلسل فيه الشياطين؟؟ والله ده إحنا اللي بنتسلسل على الكنب قدام التلفزيون من كتر المسلسلات.

بدل ما كنا بنقعد مع بعض على السفرة نفطر، بقى كل واحد بياخد طبقه ويقعد قدام التلفزيون يلحق المسلسل اللي حبك ييجي بعد الآذان على طول، أو لو المسلسل  بييجي بعد الفطار بـشوية يبقى نكَروت بقى العيلة والصلاة وكل حاجة ونلحق الحلقة قبل ماتضيع علينا. ده غير طبعاً الإعادة في نص الليل اللي برضه بنشوفها بدل ما نصلي تهجد ولا نقرأ قرآن، والإعادة اللي بالنهار اللي ممكن تضَيّع صيامنا أصلاً من كتر الحاجات العجيبة اللي بنشوفها... حاجة حزينة بصراحة.

بس كل دي حاجات مجرد حزينة  مش أكتر، وييجي إيه الحزن جنب حرقة الدم؟ اللي يحرق الدم بجد بقى.. إننا في الشهر الكريم ده مبقاش عندنا أي مشكلة نعمل مسلسل عن قصة حياة رقّاصة... رقّاصة!!! ليه طيب؟ ما فيه 12شهر غير رمضان ممكن نحكي فيهم قصتها (ده على أساس إن الناس مهتمة قوي تعرف). طب بلاش الرقّاصة. ليه نعمل مسلسل عن واحدة كل اللي بتعمله إنها بتلبس قصير ومفتوح وبتجوز رجالة كتير؟ أو عن التحقيق في قضية قتل واحدة سمعتها مش كويسة... لأ والموضة بقى إن العادي هو؛ ستات بترقص وبتردح طول الوقت...رجالة بتشتم شتايم بشعة وبتضرب وبتسكر...وعلاقات مش تمام وسرقة وقتل.. كل أنواع الإجرام والسوقية والوحشية وحاجات تانية كتير سيئة. كل ده في رمضان...ليه؟! ما إحنا شغالين مسخرة وقلة أدب طول السنة في السينما والتلفزيون... ما ينفعش تسيبوا رمضان بس في حاله؟

الخلاصة أيها الممثلين والمخرجين والمنتجين الكرام، ما حدش طلب منكم تعملوا مسلسلات دينية. بس يا ريت تعرضوا مواضيعكم المهمة والخطيرة في أي شهر تاني غير رمضان. وسيبوا لنا بقى الشهر الكريم ده نتعبد فيه ونقرب من ربنا شوية، الموضوع مش صعب. وشكرا.